خالد حسني

أنا قاعد لازق راسي في الشاشة ومكبر الخط ييجي 500% عشان أشوف أنا بكتب ايه

مش عارف همشي فس الشارع دلوقتي من غير نضارة ازاى، هنزل أخبط وخلاص يمكن ألاقي محل يخلصها علي بكرة

منك لله ياللي في بالي

المرة دي الحادثة عندنا في شبين والمرة الجاية هكون راكب القطر ، هما مستقصديني أنا عارف، الحادثة جاية عليه، اﻷول قليوب بعدين تقرب شوية شبين بعدين تقرب أكتر وأكون راكب فى القطر

ايه الهبل اللي أنا بقوله ده؟

الناس عماله تموت كل يوم وولاد ال*** يقولك هنطور السكة الحديد ، يخى أ**ه ﻷ و مدير المستشفي يقولك ﻷ دي بسيطة مش كارثة ولا حاجة يد

طبعا المواطن المطحون اللى هوه أنا وبلاد العجائب هيه بلاد العجائب حد ميعرفهاش ؟

المهم بقى أصل الحكاية أن أخوكم المتنيل على عينه (أنا) قرر يسكن السنة دى فى المخروبة المعروفة خطأ باسم المدينة الجامعية، قلت ياواد يمكن تتأخر يوم فى المستشفى ولا يكون عندك درس متأخر أهه تبيت هناك بدل التنطيط فى المواصلات فى نص الليل.

المهم أنا مش أول مرة أسكن يعنى، ﻷ سكنت مرتين قبل كده، بس مسكنتش السنة اللى فاتت وكنت ناوى مااتنيل اقرب من المخروبة دى تانى انما ايه المنحوس منحوس.

دول اللى ماتوا لحد دلوقتى فى حادثة قطار قليوب

المشكلة دلوقتى مين المسئول؟ القطار ولا الركاب ولا السواق ولا واحد من حزب المختلين عقليا ولا عم عبده البقال ولا نفيسة مرات زقلط ولا أنا ؟

يبدو أننى صرت مجنونا بـ mlterm :)

لقطة جديدة مع irssi

تقوم مجموعة من المتطوعين من مجموعة مستخدمي جنو لينكس مصر بتنظيم يوم كامل للمساهمة بإضافة أو تطوير أو تعديل مقالات بموسوعة ويكيبيديا العربية

يتم التنظيم لهذا اليوم بصفحة ويكي هنا

ساهم بمعرفتك و ساعد على نشر حرية العلم بالموسوعة

ملحوظة: أنا نقلت الكلام بالنص من عند [http://www

لقطة للمدونة بعد اثيمة الجديدة من mlterm+w3m

طبعا الثيمة الجديدة مش عاملة فرق أصلا :)

وصلت النهارده للفصل التاسع من كتاب How to Think Like a Computer Scientist نسخة بيثون

و إن شاء الله أخلصه اﻷسبوع ده، أو الجاى أقصى حاجة

بصراحة اللى مخلينى متمسك بالكتاب ﻵخره أنه بيتكلم بطريقة نظرية نوعا ما عن أساسيات البرمجة بصورة عامة، وأنا شايف أن دى أول حاجة الواحد لازم يعرفها، وبعد كده الواحد يقرأ اللى هوه محتاجة عن موديول أو مكتبة معينة لما ييجى وقت الشغل الحقيقى

المدونات مقلوبة الدستور راحت الدستور جت، صحفين طلعت وصحفين دخلت

معرفش بقى أنا عبيط ولا شكلى كده، ولا أنا اللى مبقراش جرانين أساساً

أنا أصلا أول مرة اسمع عن الدستور دى لما الفلم الهندى ده حصل، ومظنش أن أننا قريتها قبل كده، ومن كل اﻷسماء اللى اتقالت معرفتش غير عمرو سليم - أظن ان أنا بشوف الكاريكاتير بتاعه من زمان- وعبير العسكرى - ودى مش متأكد ان كانت هى اللى فى بالى ولا ﻷ-

بعد معرفش قد إيه من التدوين - بصراحة أنا مكسل أجيب أول تدوينة وشوف تاريخها كام - حاسس أن أنا غريب و لوحدى فى عالم المدونين - إذا كان فى حاجة اسمها عالم المودنين أصلا -

يعنى أنا معرفش أى حد من المدونين معرفة قريبة - حتى الناس اللى اعرفهم أعرفهم ﻷسباب لا علاقة لها بالتدوين - وتقريبا ما بتابعش أى مدونة متابعة منتظمة - ولا حتى المدونات اللى أنا حاطط ليها روابط فوق - ومفيش حد معين - على حد علمى - بيتابع المدونة دى، وحتى أغلب التعليقات من أشخاص مجهولين.